മലയാളം: ഇന്ത്യയിൽ കാണപ്പെടുന്ന ഏറ്റവും വലിയ ശലഭങ്ങളിൽ മൂന്നാമനാണ് ചുട്ടിക്കറുപ്പൻ. സാധാരണ ഇവയെ കാട്ടിലാണ് കണ്ടുവരുന്നത്. പൂന്തോട്ടങ്ങളിലും കാണാറുണ്ട്. ചുട്ടിക്കറുപ്പന്റെ ചിറകിന്റെ ചുറ്റളവ് 110 മുതൽ 130 മില്ലിമീറ്റർ വരെയാണ്. പേര് സൂചിപ്പിക്കും പോലെ ഇവയുടെ ശരീരവും ചിറകുകളും കറുത്തതാണ്. പിൻചിറകിന്റെ മുകൾഭാഗത്ത് ഇളം മഞ്ഞ നിറഞ്ഞ വെളുത്ത പാടുകൾ കാണാം. ഉയരത്തിൽ പറക്കാൻ താല്പര്യപ്പെടുന്നവരാണ് ഇക്കൂട്ടർ. എന്നിരുന്നാലും താഴെയുള്ള സസ്യങ്ങളിൽ നിന്ന് തേൻ നുകരാൻ ഇവ എത്താറുണ്ട്. വേഗത്തിലാണ് പറക്കൽ. മുള്ളിലവ്, ചെറുനാരകം, കാട്ടുകറിവേപ്പ് എന്നിവയിലാണ് മുട്ടയിടുന്നത്. മുട്ടകള്‍ക്ക് ഇളം മഞ്ഞ നിറമാണ്. 4-7 ദിവസങ്ങള്‍ കൊണ്ട് മുട്ട വിരിയുന്നു. വിരിയാറാകുമ്പോള്‍ ചോക്കളേറ്റ് നിറത്തിലുള്ള വരകള്‍ കാണാം. മറ്റ് പാപ്പിലിയോ കിളിവാലന്‍ ശലഭങ്ങളെപ്പോലെത്തന്നെ ചുട്ടിക്കറുപ്പന്റേയും ലാര്‍വ്വകള്‍ പക്ഷിക്കാഷ്ഠത്തെ അനുസ്മരിപ്പിക്കുന്ന രൂപത്തിലാണ് ആദ്യം കാണപ്പെടുക. പിന്നീട് ഇളംപച്ച നിറത്തിലാകുന്നു. പതിനഞ്ചു ദിവസങ്ങള്‍ക്കു ശേഷം പ്യൂപ്പയാകുന്നു. 12-15 ദിവസങ്ങളോളം പ്യൂപ്പയായിരുന്ന് ശലഭം പുറത്തു വരുന്നു.