മലയാളം: ഇതു കേരളാത്തില്‍ കാണുന്ന നാട്ടുമാവ്‌. വളരെ വലുതാവുന്ന ഉയരം വയ്ക്കുന്ന ദീര്‍ഘകാലം വളരുന്ന നല്ലവണ്ണം ഫലം തരുന്ന ഒരു കൂട്ടം മാവ്‌ ഇനങ്ങള്‍. ഓരോന്നിനും ഓരോ രുചി, ഓരോ വലിപ്പം. കായ്ച്ചുതുടങ്ങാന്‍ വയ്കും. താരതമ്യേന ചെറിയ മാങ്ങകള്‍. നല്ല പുളിയുള്ളത്‌. അണ്ടിയുറയ്ക്കുന്നതിനു മുന്നേ നിലത്തുവീഴാതെ കയറിപ്പറിച്ച്‌ കണ്ണിമാങ്ങയുണ്ടാക്കുന്നു. പഴുത്ത്‌ നിലത്ത്‌ വീഴുന്ന കാലം വന്നാല്‍ ചുവട്ടില്‍ കുട്ടികളുടെ ആരവമായിരിക്കും. വിത്തുവിതരണം പക്ഷികളും വവ്വാലുകളും കുട്ടികളും നടത്തും. കായകള്‍ ധാരാളമായി മുളയ്ക്കും. എല്ലാ വളപ്പിലും പണ്ട്‌ നിറയെ ഉണ്ടായിരുന്നു. ഏകവിളത്തോട്ടങ്ങള്‍ അതിക്രമിച്ചു തുടങ്ങിയതോടെ പതിയെ നാടുനീങ്ങുന്നു. റോഡുവക്കിലും വഴിയോരത്തുമെല്ലാം ഇന്നും ഉണ്ട്‌. ഇവയെ ഭാവിക്കായി കരുതലോടെ സംരക്ഷിക്കേണ്ടിയിരിക്കുന്നു.